Un grande bove nigre appellate Buck demandava su portion. Si necuno faceva attention a illo, illo approcharea le enorme marmita e lo reguardarea fixemente.
Illo clarmente indicava que illo voleva su portion anque.
Isto occurreva a un partita de cabana a sucro a Leeds in le Contato de Megantic, in le Cantones del Est de Quebec qualque 90 annos retro. Le succo
fluente del primavera del arbores de acere habeva essite colligite e reducite in un cabana a sucro in le foreste.
Il era le bon tempore pro un celebration. Tante que 50 a 60 personas poteva esser invitate a gustar le nove succo e siropo del saison. Le bove habeva omne derectos a assister al partita, como illo habeva jocate un rolo in le processo de facer le sucro.
Le succo debeva esser colligite de situlas attachate a cata arbore. Buck, le bove, tirava le trahea portante le grande receptaculo in le qual le situlas era
vacuate. Tunc le sucro colligite era transportate al cabana ubi illo era reducite a un siropo.
Quando Buck videva le partita habente loco, illo voleva junger lo. Illo non era jammais repellite. Le justitia de su demanda era recognoscite per omnes e
illo era sempre accordate su portion del sucro.
Le methodo a un partita de degustation de siropo de acere differeva de loco a loco per le Cantones del Est. A Dunham e a Stanbridge Est in le Contato de
Missisquoi le invitatos usualmente se reuniva circum bassinos plen de nive. Quando le siropo era del consistentia correcte, illo era versate super le nive, e quando un pauc dur, le siropo era mangiate com forchettas.
A cabanas a sucro presso Cookshire e Sawyerville in le Contato de Compton, le invitatos era sovente data grande spatulas de ligno le quales era immergite in le enorme marmitas de siropo bulliente.
Grande gruppos era sovente invitate. Graduatos del Schola Secundari de
Cookshire del annos ’20 e ’30 memorava com nostalgia le postmeridies de venerdis
quando le schola integre serea invitate al cabana de sucro del familia Meredith a un
pauc distantia del citate. Le classes era cancellate e le studiantes e lor professores
vadeva a pede al bosco, equipate de lor spatulas pro passar un tempore satisfacente.
Gruppos de scholas de dominica del Ecclesia Methodista era invitate cata anno al cabana a sucro de Oscar Martin presso Durham.
George Halliday cuje ferma era a Sawyerville habeva multe amicos qui attendeva com
ardor lor inviattiones a un de su partitas. Non omnes del partitas del preparation del
siropo de acere era foras. Multes habeva loco in le basamentos de ecclesias. Feminas
del Congregationes bulliva siropo super estufas a ligno. Membros plus juvene lo portava al tabulas in grande urceos ex le quales le invitatos qui habeva pagate pro
assister se servirea del siropo calide per versar lo super le nive in bassinos placiate
ante illos. In le annos ’20 illo costarea qualque centos [10, 15 usque a 25 centos]
pro assister a un tal partita.
Un Ministro methodista in Dunham, Ver. George Forde imprimeva billetes pro iste partitas super su proprie imprimitor a mano que es ora in le
Museo de Scientias a Ottawa.
Le traditiones del cabana a sucro es typicamente canadian, sempre popular,
mesmo si ora un pauc plus commercialisate, e illo adjuta a definir qui nos es. Illo es un
passatempore pro celebrar le retorno del bom tempore del primavera e le nove vita de
un altere anno post le frigor de un hiberno canadian.
[Richard Sorfleet, CANADA]
Internovas 